Advertisement

नीरा-भीमा जोड बोगद्याचे काम तीन वर्षांपासून ठप्प; धाराशिवच्या पाणीप्रश्नावर सरकारची उदासीनता!

प्रजापत्र | Monday, 16/11/2026
बातमी शेअर करा

धाराशिव दि.16(प्रतिनिधी): कृष्णा-मराठवाडा सिंचन प्रकल्पांतर्गत धाराशिव जिल्ह्याच्या दृष्टीने अत्यंत महत्त्वाचा असलेल्या नीरा-भीमा जोड बोगद्याचे काम निधीअभावी जून २०२३ पासून बंद आहे. एकीकडे धाराशिव जिल्ह्यातील शेतकरी सातत्याने दुष्काळ आणि पाणीटंचाईचा सामना करत असताना दुसरीकडे जिल्ह्याच्या पाणीप्रश्नावर कायमस्वरूपी तोडगा काढण्याची क्षमता असलेला महत्त्वपूर्ण सिंचन प्रकल्पच रखडला आहे. त्यामुळे धाराशिवच्या पाणीप्रश्नाबाबत सरकारची उदासीनता पुन्हा एकदा समोर आली असल्याची टीका शिवसेना (उद्धव बाळासाहेब ठाकरे) पक्षाचे जिल्हा प्रवक्ते तानाजी जाधवर यांनी केली आहे. या गंभीर प्रश्नावर भाजप आमदार राणाजगजीतसिंह पाटील यांनी पुढाकार घेऊन सरकारला जाब विचारावा आणि प्रकल्पाच्या कामाबाबत आपली भूमिका स्पष्ट करावी, अशी मागणीही त्यांनी केली आहे.

नीरा-भीमा जोड बोगद्याची एकूण लांबी २३.६८ किलोमीटर आहे. या महत्त्वाकांक्षी बोगद्याचे आतापर्यंत २०.९९ किलोमीटर काम पूर्ण झाले असून, केवळ २.६९ किलोमीटर काम अद्याप अपूर्ण आहे. म्हणजेच प्रकल्पाचे बहुतांश काम पूर्ण झालेले असतानाही उर्वरित कामासाठी आवश्यक आर्थिक नियोजन आणि निधी उपलब्ध न झाल्याने हा प्रकल्प रखडला आहे. प्रकल्पाच्या उर्वरित कामाचा तपशील पाहता चार वेगवेगळ्या ठिकाणी काम अपूर्ण असल्याचे स्पष्ट होते.

उद्धट बंधाऱ्याच्या बाजूला १.०८ किलोमीटर लांबीचे ओपनकटचे काम आणि त्यापुढील सुमारे ८०० मीटर बोगद्याचे काम बाकी आहे. त्याचप्रमाणे उजनीच्या बाजूला भादलवाडीजवळ ४४८ मीटर बोगद्याचे काम अपूर्ण आहे. तसेच बोगद्याच्या शेवटच्या टप्प्यातील ३६० मीटर ओपनकटचे कामही अद्याप पूर्ण झालेले नाही. अशा प्रकारे अवघे २.६९ किलोमीटर काम शिल्लक असताना संपूर्ण प्रकल्पाचे काम बंद पडणे ही अत्यंत गंभीर बाब आहे.

विशेष म्हणजे, जून २०२३ पासून या प्रकल्पाचे काम पूर्णपणे बंद असल्याची माहिती समोर येत आहे. आर्थिक नियोजनाअभावी कामाला खीळ बसल्याने प्रकल्प पूर्णत्वास जाण्यास विलंब होत आहे. आता शासनाने तातडीने निधी उपलब्ध करून काम पुन्हा सुरू केले तरी उर्वरित काम पूर्ण होण्यासाठी किमान एक ते दोन वर्षांचा कालावधी लागण्याची शक्यता आहे. त्यामुळे आणखी किती काळ धाराशिव जिल्ह्यातील जनतेला पाण्यासाठी प्रतीक्षा करावी लागणार, असा प्रश्न उपस्थित होत आहे.

धाराशिव जिल्हा हा कायम दुष्काळी परिस्थितीचा सामना करणारा जिल्हा म्हणून ओळखला जातो. पावसाचे अनियमित प्रमाण, भूजल पातळीत होणारी घट, सिंचनाच्या अपुऱ्या सुविधा आणि पिण्याच्या पाण्याची टंचाई यामुळे जिल्ह्यातील शेतकरी आणि ग्रामीण भागातील नागरिकांना दरवर्षी अनेक अडचणींना सामोरे जावे लागते. शेतीसाठी पाणी उपलब्ध नसल्याने पिकांचे नुकसान होते, उत्पादनात घट येते आणि शेतकऱ्यांचे आर्थिक गणित कोलमडते. अशा परिस्थितीत कृष्णा-मराठवाडा सिंचन प्रकल्पासारख्या महत्त्वपूर्ण योजनांकडून जिल्ह्याला मोठ्या अपेक्षा आहेत.

नीरा-भीमा जोड बोगद्याचे काम पूर्ण झाल्यास या सिंचन प्रकल्पाच्या माध्यमातून पाणी उपलब्धतेच्या नियोजनाला महत्त्वपूर्ण चालना मिळू शकते. त्यामुळे या प्रकल्पाचे उर्वरित काम तातडीने पूर्ण करणे आवश्यक आहे. मात्र, केवळ काही किलोमीटरचे काम शिल्लक असतानाही प्रकल्प रखडलेला असेल, तर शासनाच्या प्राधान्यक्रमाबाबत प्रश्न उपस्थित होणे स्वाभाविक आहे.

सरकारकडून मराठवाड्याच्या विकासासाठी, दुष्काळमुक्तीसाठी आणि शेतकऱ्यांच्या हितासाठी विविध घोषणा केल्या जातात. मात्र, प्रत्यक्षात महत्त्वाच्या सिंचन प्रकल्पांसाठी निधी उपलब्ध होत नसेल, तर या घोषणांचा उपयोग काय? प्रकल्पाचे बहुतांश काम पूर्ण झालेले असताना उर्वरित कामासाठी आर्थिक तरतूद का केली जात नाही? जून २०२३ पासून बंद असलेले काम पुन्हा सुरू करण्यासाठी शासनाने कोणती पावले उचलली आहेत? प्रकल्प पूर्ण करण्याची निश्चित कालमर्यादा काय आहे? असे अनेक प्रश्न आता उपस्थित होत आहेत.

भाजप आमदार राणाजगजीतसिंह पाटील यांनी या प्रश्नावर मौन न बाळगता पुढाकार घेण्याची गरज आहे. धाराशिव जिल्ह्यातील जनतेने लोकप्रतिनिधींवर विश्वास ठेवून त्यांना जबाबदारी दिली आहे. त्यामुळे जिल्ह्याच्या पाणीप्रश्नाशी निगडित असलेल्या या महत्त्वपूर्ण प्रकल्पासाठी त्यांनी शासनदरबारी ठोस पाठपुरावा करावा. प्रकल्पाच्या कामासाठी आवश्यक निधी कधी उपलब्ध होणार, काम पुन्हा कधी सुरू होणार आणि प्रकल्प पूर्ण करण्याची निश्चित तारीख काय, याबाबत त्यांनी जनतेसमोर स्पष्ट भूमिका मांडावी, अशी मागणी तानाजी जाधवर यांनी केली आहे.

Advertisement

Advertisement