बीड : जिल्ह्यातील वडवणी येथे सरकारी वकिलाने ( assistant public procecuter )  न्यायालयातच आत्महत्या (sucide )  केल्याची घटना घडली होती, या प्रकरणात आता मोठी घडामोड घडली आहे. आत्महत्या केलेल्या वकिलाच्या मुलाने दिलेल्या फिर्यादीवरून वडवणी पोलिसात वडवणी येथील प्रथमवर्ग न्यायदंडाधिकारी (JMFC )  रफिक शेख आणि कार्यालयातील कारकून तरडे यांच्या विरोधात गुन्हा दाखल करण्यात आला आहे. कर्तव्यावरील न्यायाधीशाच्या (judge ) विरोधात गुन्हा दाखल होण्याची कदाचित ही राज्यातील पहिलीच घटना असावी.
           बीड जिल्ह्याच्या वडवणी येथील न्यायालयात सहाय्यक सरकारी वकील म्हणून कार्यरत असलेले व्ही एम चंदेल यांनी दोन दिवसांपपूर्वी न्यायालयाच्या आवारातच आत्महत्या केल्याने खळबळ माजली होती. मयत चंदेल यांच्या खिशातून पोलिसांना सुसाईड नोट (sucide note )देखील मिळाली होती. मात्र पोलिसांनी सुरुवातीला यात आकसमिक मृत्यूची नोंद घेतली होती. आता या प्रकरणात मयत व्ही एम चंदेल यांच्या मुलाने फिर्याद दिली असून त्यात वडवणी येथील न्यायाधीश रफिक शेख हे सातत्याने अपमानित करीत असल्यानेच व्हे एम चंदेल यांनी आत्महत्या केल्याचे म्हटले आहे. त्यावरून वडवणी पोलिसांनी न्यायाधीश (judge )रफिक शेख आणि न्यायालयातील कारकून तरडे यांच्या विरोधात गुन्हा दाखल केला आहे. या घटनेने जिल्हाभरातील न्यायालयीन वर्तुळात खळबळ माजली आहे.