पुणे शिक्षक मतदारसंघाच्या मतदानाच्या दिवशी भाजपचे अधिकृत उमेदवार कौस्तुभ गावडे यांनी निवडणूक आचारसंहितेचे उल्लंघन केल्याचा आरोप करत राष्ट्रवादी युवक काँग्रेसचे प्रदेशाध्यक्ष मेहबूब शेख यांनी निवडणूक आयोगाकडे तातडीने कारवाईची मागणी केली आहे. मतदानाच्या दिवशी कौस्तुभ गावडे हे भाजपचे अधिकृत पक्षचिन्ह असलेला गमछा परिधान करून वावरताना दिसत असल्याचा व्हिडिओ समोर आल्यानंतर राजकीय वातावरण चांगलेच तापले आहे.
मेहबूब शेख यांच्या पोस्टने वेधले लक्ष
राष्ट्रवादी युवक काँग्रेसचे प्रदेशाध्यक्ष मेहबूब शेख यांनी सोशल मीडियावर पोस्ट शेअर करत या प्रकरणावर तीव्र आक्षेप नोंदवला आहे. मतदानाच्या दिवशी अशा प्रकारे जाहीरपणे पक्षचिन्हाचे प्रदर्शन करणे आचारसंहितेच्या नियमांना हरताळ फासणारे असल्याचे शेख यांनी नमूद केले. हा संपूर्ण प्रकार व्हिडिओमध्ये स्पष्ट दिसत असून निवडणूक आयोगाने तात्काळ दखल घ्यावी, अशी आग्रही मागणी त्यांनी आपल्या पोस्टद्वारे केली आहे.
लोकप्रतिनिधित्व कायद्यांतर्गत कारवाईचा आग्रह
मतदानाच्या दिवशी निवडणूक प्रक्रियेतील निष्पक्षता राखण्यासाठी निवडणूक आयोगाच्या नियमांचे काटेकोर पालन करणे प्रत्येक उमेदवारासाठी बंधनकारक असते. लोकप्रतिनिधित्व अधिनियम, १९५१ च्या कलम १३० नुसार मतदान केंद्राच्या परिसरात प्रचार करणे, पक्षाचे चिन्ह किंवा इतर प्रचार साहित्याचे प्रदर्शन करणे कायद्याने निषिद्ध आहे. उपलब्ध व्हिडिओची सत्यता, संबंधित ठिकाण आणि परिस्थितीची तातडीने चौकशी करून नियमभंग सिद्ध झाल्यास गावडे यांच्यावर कडक कायदेशीर कारवाई करण्यात यावी, असा पवित्रा शेख यांनी घेतला आहे.
‘नियम सर्वांसाठी समान असावेत’
निवडणूक प्रक्रियेची विश्वासार्हता आणि निष्पक्षता टिकवण्याची जबाबदारी निवडणूक आयोगाची असल्याचे सांगत, या प्रकरणात आयोगाने कोणत्याही दबावाखाली न येता निष्पक्ष भूमिका घ्यावी, अशी मागणी करण्यात आली आहे. तसेच या प्रकरणात नेमकी काय चौकशी झाली आणि कोणती कारवाई करण्यात आली, याची सविस्तर माहिती निवडणूक आयोगाने जनतेसमोर सार्वजनिक करावी, अशी मागणीही मेहबूब शेख यांनी लावून धरली आहे.
