माजलगाव दि.१३(प्रतिनिधी) : तालुक्यातील परिसरातील एका अल्पवयीन मुलीचा विवाह लावून दिल्याप्रकरणी तिच्या आई वडिलांसह नवरदेव, सासू व सासरे अशा पाच जणांविरुद्ध गुन्हा दाखल करण्यात आला आहे. नवरदेवावर बलात्कार आणि पॉक्सो कायद्यांतर्गतही कारवाई करण्यात आली आहे.
मिळालेल्या माहितीनुसार, माजलगाव ग्रामीण पोलिस ठाणे हद्दीतील एका अल्पवयीन मुलीचा विवाह परभणी जिल्ह्यात लावून देण्यात आलाहोता. दरम्यान, ९ जून रोजी संबंधित मुलीला पोटदुखीचा त्रास होत असल्याने तिला माजलगाव ग्रामीण रुग्णालयात उपचारासाठी दाखल करण्यात आले. तपासणीदरम्यान ती अल्पवयीन असल्याचे वैद्यकीय अधिकाऱ्यांच्या निदर्शनास आले. यानंतर रुग्णालय प्रशासनाने तातडीने पोलिसांना माहिती दिली.माजलगाव ग्रामीण पोलिसांनी मुलीच्या वयाची पडताळणी केली असता ती अल्पवयीन असल्याचे स्पष्ट झाले. त्यानुसार मुलीचे आई-वडील तसेच सासू-सासरे यांच्याविरुद्ध बालविवाह प्रतिबंधक कायद्यान्वये गुन्हा नोंदविण्यात आला. तसेच, मुलगी अल्पवयीन असल्याची माहिती असूनही तिच्याशी शारीरिक संबंध ठेवून तिला गरोदर केल्याप्रकरणी पती विरुध्द बलात्कार व पॉक्सो कायद्यांतर्गत गुन्हा दाखल करण्यात आला आहे.या प्रकरणात अद्याप कोणालाही अटक करण्यात आलेली नसून पुढील तपास एपीआय सचिन धोरणाचार्य, पिंक पथक प्रमुख, करीत आहेत.
