मुंबई : राज्यात पुन्हा एकदा (Rain)पावसाचा जोर वाढला असून आज ७ जुलै रोजी देखील राज्यातील सर्वच भागांत पावसाची शक्यता वर्तविण्यात आली आहे. हवामान विभागाच्या अंदाजानुसार कोकण, पश्चिम महाराष्ट्र, उत्तर महाराष्ट्र, मराठवाडा आणि विदर्भातील काही जिल्ह्यांत मुसळधार पाऊस पडण्याची शक्यता आहे. राज्यात पावसासाठी पुढील पाच दिवस महत्वाचे आहेत.

            पश्चिम महाराष्ट्रातील पुणे, सातारा जिल्ह्यतील घाटमाथ्यावर मुसळधार पावसाची शक्यता असल्यानं पावसाचा ऑरेंज अलर्ट जारी करण्यात आला आहे. याशिवाय कोल्हापूर परिसरातील घाटमाथा परिसरात देखील मुसळधार पावसाची शक्यता आहे यामुळे येथे यलो अलर्ट जारी करण्यात आला आहे.मराठवाड्यातील जालना, परभणी, हिंगोली, नांदेड या सर्व जिल्ह्यांत मुसळधार पावसाची शक्यता आहे, येथे पावसाचा येलो अलर्ट जारी करण्यात आला आहे. (Beed)बीड, लातूर, धाराशिव या तीन जिल्ह्यांत वादळ वाऱ्यासह हलक्या ते मध्यम स्वरूपाच्या पावसाची शक्यता हवामान विभागाने वर्तवली आहे.कोकण विभागात ठाणे, पालघर, सिंधुदुर्ग जिल्ह्यांत मुसळधार पावसाची शक्यता असून यलो अलर्ट जारी करण्यात आला आहे तर रायगड, रत्नागिरी या दोन जिल्ह्यांत ऑरेंज अलर्ट जारी करण्यात आला आहे. मुंबईत काही ठिकाणी मुसळधार पावसाचा अंदाज हवामान विभागाने वर्तविला आहे.

विदर्भातही मुसळधार पावसाची शक्यता आहे. अकोला आणि यवतमाळ या जिल्ह्यांत यलो अलर्ट जारी करण्यात आला आहे. अमरावती, भंडारा, चंद्रपूर, गडचिरोली, गोंदिया, नागपूर आणि वर्धा या सर्व जिल्ह्यांना पावसाचा ऑरेज अलर्ट जारी करण्यात आला आहे.उत्तर महाराष्ट्रातील धुळे, नंदुरबार आणि नाशिक घाटमाथा परिसरात मुसळधार तर जळगाव जिल्ह्यांत विजांच्या कडकडाटासह पावसाची शक्यता असल्याने या सर्व जिल्ह्यांना पावसाचा यलो अलर्ट जारी करण्यात आला आहे. नाशिक आणि अहिल्यानगर जिल्ह्यांत हलक्या ते मध्यम स्वरूपाच्या पावसाची शक्यता आहे.